Venera Gerasimoff häm İldar Xarisov, Berlin

Tatarlar Berlinnı yauladı

Nihayät, başlandı!

Berniçä ayğa barğan äzerlänü, dulqınlanudan soñ Berlinnıñ Auropa mädäniätläre muzeyında Tatar mädäniäte könnäre açıldı. 30 avgusttan alıp 14 sentäbergä çaqlı däwam itäçäk bu Könnär Berlinnıñ massaküläm mäğlümat çaralarında zur qızıqsınu uyattı. Açılu tantanası başlanğançı uq xalıq ta bik küp cıyılğan ide — urınsız qaluçılar bixisap buldı. Vaymar, Mayns, Hamburg, Brandenburg h.b. cirlärdän tatarlar cıyılğan. Almannar da zur qızıqsınu kürsätte.

Kiçä «Tuğan tel» cırı belän başlandı. Qotlau süzläre küp yañğıradı häm alar zur qızıqsınu belän tıñlandı. Muzey direktorı Konrad Vani, Berlin tyurkologiä institutı rektorı Barbara Kelner-Xaynkele, Berlindağı Tatar-başqort mädäniäte üzäge wäkile Venera Wäğizova çığışları — şundıylardan. Rossiä Federatsiäse ilçelege attaşesı Dmitriy Balandin çığışı da küñellärgä sarı may bulıp yattı. Ul tatar xalqı mädäniäteneñ Rossiä mädäniätennän ayırılmaslığın häm Rossiä mädäniäteneñ, ägär dä ul ğasırlar buyına tatar xalqı belän bäylänmägän bulsa, bolay uq zur tarixlı bulmaslığın assızıqladı.

Pianist Söyembikä Älibay başqaruında Röstäm Yaxin äsärläre yañğırağannan soñ alqışlar ozaq tınmadı. Filologlar İlmira Miftaxova häm Elif Dilmaç Tatarstannıñ ataqlı xatın-qızlarına bağışlanğan «1001 yöz» digän çığış yasadılar. Rafael' Abdrazakov başqaruında fleytada tatar kompozitorlarınıñ äsärläre, başqort biülären biegän almanlı Yeva-Mariya Flasxar h.b. çığışları publika tarafınnan yuğarı bäyälände.

Muzeynıñ kinozalında estetika turındağı Qazanda töşerelgän fil'm kürsätelde. Üzebezneñ rässamnar Nuri Hadiev, Renat Tumarov, Cämil Xergender räsemnäre tamaşaçıda tere qızıqsınu uyattı. «Tatarlar — Berlinda» dip atalğan kürgäzmäneñ başqa eksponatları da küz yawın alırlıq ide. Çikkän sölgelär, tübätäy-qalfaqlar, xatın-qız qamzulı, bolğar çorınıñ pıçaq totqası, qulyazma cır däftäre — bu qimmätle äyberlärneñ barısı da ğailälärdä qäderläp saqlana.

31 könne Tatar mädäniäte könnäre «Oazis» millätara mädäniät üzägendä däwam itte. Anda filolog Aliä Taysina «Alman belletristikasında tatarlar häm başqortlar obrazı» temasına notıq uqıdı. Baqsañ, tatarlar häm başqortlar urta ğasırlardan birle alman telendäge äsärlärneñ qaharmannarı bulğan ikän. Millättäşlärebez häm watandaşlarıbızdan başqa, biregä almannar üzläre dä qızıqlı çığışlarnı tıñlarğa küpläp kilde.

Berlindağı Tatar mädäniäte könnäre äle başlandı ğına. Alda — qızıqlı programma: leksiälär, äkiätlär, qul eşläre, milli uyınnar h.b.